'कोण प्रणिती शिंदे?, त्या आमच्यासाठी चिल्लर'; शिवसेना उबाठाच्या बड्या नेत्याची टीका, सोलापूर मविआत चाललंय तरी काय?

सोलापूर- सध्या महाराष्ट्रात आगामी स्थानिक स्वराज्य संस्था, महापालिका निवडणुकांच्या पार्श्वभूमिवर राजकीय जगतात मोठमोठे उलटफेर पाहायला मिळत आहेत. प्रचंड ताकदीचे विविध नेते पक्षांतर करत आहेत. तर सत्ताधारी गटामध्ये जोरदार प्रवेश होत आहेत. राज्यात या निवडणुकांमध्ये महायुती व महाविकास आघाडी एकत्र लढणार की नाही हे येणाऱ्या काळातच स्पष्ट होणार आहे. सध्यातरी अनेक ठिकाणी आघाड्यांमध्ये बिघाड होणाऱ्या घटना समोर येत आहेत.सध्या सोलापूरमधूनही अशीच एक घडामोड समोर येत आहे. यामध्ये सोलापूर महाविकास आघाडीच वादाचे चित्र समोर आले आहे. ठाकरेंची शिवसेना आणि काँग्रेसमध्ये मोठे मतभेद झाल्याचे उघड झाले आहे. ठाकरेंच्या शिवसेनेचे उपनेते शरद कोळी यांनी सोलापूरच्या काँग्रेस खासदार प्रणिती शिंदे यांच्यावर जोरदार टीका केली आहे. त्यांनी कोण प्रणिती शिंदे? त्या आमच्यासाठी चिल्लर आहेत, अशा जहरी शब्दांमध्ये टीका केली आहे. त्यामुळे सध्या या वादाची सोलापूरमध्ये जोरदार चर्चा आहे.

शरद कोळी नेमकं काय म्हणाले आहेत?

“विधानसभेला आमच्याबरोबर गद्दारी करणाऱ्या प्रणिती शिंदे यांच्याबरोबर आम्ही युती करणार नाही. आघाडी तुटली तरी काही समस्या नाही, पण प्रणिती शिंदे यांचं नेतृत्व आम्हाला मान्य नाही”, असं शरद कोळी म्हणाले आहेत.

पुढे बोलताना ते म्हणाले की, उद्धव साहेबांच्या आदेशाला सन्मान न देणाऱ्या प्रणिती शिंदे या महाविकास आघाडी धर्म पाळण्यात अपयशी ठरल्या आहेत. विरोधकांशी हातमिळवणी करुन आघाडीला मातीत आणि गाळात नेऊन ठेवले आहे, असं म्हणत त्यांनी प्रणिती शिंदेंवर प्रहार केला आहे.

वैयक्तिक टीका

उद्धव ठाकरेंनी लोकसभा निवडणूक सुरु असताना प्रणिती शिंदे यांच्यासाठी प्रचारसभा घेतली होती. त्यांनी महाविकास आघाडी धर्म पाळत प्रणिती शिंदेंच्या उमेदवारीला पाठिंबा दिला होता. त्यावरुनही शरद कोळींनी खासदार प्रणिती शिंदेंना सुनावलं आहे. ते म्हणाले की, उद्धव साहेंबासमोर मताची झोळी पसरवून खासदार झालेल्या प्रणिती शिंदे आता मोठेपणा दाखवतात. त्या शिवसेनेमुळे खासदार झाल्याचं भान त्यांना नाही. उद्धव साहेबांनी त्यांना स्वतः सांगितलं होतं की, तुम्ही खासदार झाला आहात, आघाडीचा धर्म पाळा. पण, खासदारांनी साहेबांचा हा आदेश पाळला नाही, त्यामुळे त्या आमच्यासाठी चिल्लर आहेत, असं शरद कोळी म्हणाले आहेत. आघाडीबाबत बोलताना शरद कोळींनी सांगितलं की, ठाकरेंची शिवसेना काँग्रेसबरोबर आघाडीत राहण्यास तयार आहे पण, प्रणिती शिंदे यांचं नेतृत्व कोणत्याही परिस्थितीत मान्य नाही. त्यामुळे शरद कोळींच्या या विधानांनंतर आता सोलापूर काँग्रेस आणि ठाकरेंच्या शिवसेनेतील वाद आता चव्हाट्यावर आला आहे, यापूढे हा वाद चिघळू शकतो असेही राजकीय विश्लेषकांचे मत आहे.