सोलापूर: राष्ट्रवादी शरदचंद्र पवार पक्षाचे अध्यक्ष शरद पवार यांनी स्थानिक स्वराज्य संस्थांच्या निवडणुकीच्या पार्श्वभूमीवर सोलापुरात भाकरी फिरवली आहे. पक्षाच्या सोलापूर शहराध्यक्षपदी रविवारी सायंकाळी महेश गादेकर यांची नियुक्ती झाल्याचे पत्र जाहीर करण्यात आले आहे. प्रदेशाध्यक्ष शशिकांत शिंदे यांनी याबाबतचे पत्र जारी केले. महेश गादेकर हे 1992 पासून शरद पवारांसोबत काम करत आले आहेत. राष्ट्रवादीच्या स्थापनेनंतर महेश गादेकर यांनी काँग्रेस सोडली आणि शरद पवारांसोबत गेले. तेव्हापासून आतापर्यंत ते पवारांशी एकनिष्ठ आहेत. त्यामुळे आता शरद पवारांनी शहराध्यक्षपदाची जबाबदारी पुन्हा एकदा विश्वासू नेत्याकडे सोपवल्याने पवारांच्या राष्ट्रवादीत नवी उमेद निर्माण झाली आहे.सोलापूर महापालिका निवडणुकीच्या तोंडावर राष्ट्रवादी शरदचंद्र पवार पक्षाचे शहराध्यक्ष सुधीर खरटमल यांनी गुरुवारी अचानक राजीनामा देत उपमुख्यमंत्री अजित पवार यांच्या नेतृत्वातील राष्ट्रवादीत प्रवेश केला होता. खरटमल यांच्या जागी नव्या अध्यक्षाची निवड करण्यात आली आहे. सुधीर खरटमल यांच्या अचानक राजीनाम्यानंतर शरद पवारांच्या राष्ट्रवादीत नवीन चेहऱ्याला संधी मिळणार अशी चर्चा होती. मात्र शरद पवारांनी भाकरी फिरवत जुन्या मित्राच्या खांद्यावर शहराध्यक्षपदाची जबाबदारी दिली आहे.
हर्षवर्धन पाटील यांनी घेतली होती बैठक
सोलापूर जिल्हा प्रभारी हर्षवर्धन पाटील यांनी शुक्रवारी सोलापुरात येऊन बैठक घेतली होती. या बैठकीत शहराध्यक्षपदासाठी महेश गादेकर यांच्यासह माजी महापौर यू एन. बेरिया, विद्यमान सरचिटणीस चंद्रकांत पवार यांची नावे चर्चेत आली होती. पक्षाने महेश गादेकर यांची निवड केली. महेश गादेकर हे 1992 पासून शरद पवारांसोबत काम करतात. राष्ट्रवादीच्या स्थापनेनंतर त्यांनी काँग्रेस सोडली आणि पवारांसोबत गेले. तेव्हापासून आतापर्यंत ते पवारांशी एकनिष्ठ आहेत. महेश गादेकर यांनी राष्ट्रवादीचे युवक अध्यक्ष ते शहराध्यक्ष असा राजकीय प्रवास केला आहे. पक्षाने महापालिकेची 2012 ची निवडणूक त्यांच्या नेतृत्वाखाली लढवली होती. आता महापालिका निवडणुकीच्या तोंडावर पक्षाने पुन्हा त्यांची शहराध्यक्षपदी निवड केली आहे.
About the Author
