सोलापूर : राज्यभरात चर्चेचा विषय ठरलेली सोलापूर जिल्ह्यातील अनगर नगरपंचायत अध्यक्षपदाची निवडणूक स्थगित करण्यात आली आहे. जिल्हा निवडणूक अधिकारी तथा जिल्हाधिकारी कुमार आशीर्वाद यांनी यासंबंधी आदेश जारी केले आहेत. सुधारित निवडणूक कार्यक्रमानुसार पुढील कार्यवाही केली जाणार आहे. उज्ज्वला थिटे यांचा अर्ज अपात्र ठरल्यानंतर भाजपच्या प्राजक्ता अजिंक्यराणा पाटील यांची नगराध्यक्षपदी बिनविरोध निवड झाली होती. माजी आमदार राजन पाटील यांचे सुपुत्र बाळराजेंनी थेट उपमुख्यमंत्री अजित पवार यांना ललकारल्यानंतर ही निवडणूक चर्चेत आली होती.सोलापूरचे जिल्हाधिकारी कुमार आशीर्वाद यांनी मंगळवेढा नगरपालिका आणि अनगर नगरपंचायत यांच्या निवड प्रक्रियेला स्थगिती आदेश दिले आहेत. आता सुधारित कार्यक्रमानुसार येथील निवडणूक प्रक्रिया घेतली जाणार असल्याचे आदेशात नमूद आहे .
नगराध्यक्षपद निवडणुकीला स्थगिती का?
ज्या ठिकाणी अपील दाखल होतं आणि कोर्टाने 23 तारखेपर्यंत निकाल दिले आहेत, तिथे आधीची प्रक्रिया राहील. मात्र अनगरचा निकाल न्यायालयात 25 तारखेला झाल्याने तांत्रिक दृष्टीने प्रक्रिया पूर्ण करावी लागेल. नवीन कार्यक्रमानुसार प्रक्रिया पार पाडताना अनगरमध्ये प्रत्येक पदासाठी केवळ एक अर्ज असल्याचे निवडणूक आयोगला कळवले जाईल. त्यानंतर निवडणूक आयोगातर्फे बिनविरोध निवडीची घोषणा होईल.
काय आहे प्रकरण?
अनगर नगरपंचायत नगराध्यक्षपदाच्या निवडणुकीत तीन उमेदवारी अर्ज दाखल करण्यात आले होते. भाजपकडून राजन पाटलांची सून प्राजक्ता अजिंक्यराणा पाटील, राष्ट्रवादी काँग्रेस अजित पवार गटाकडून उज्ज्वला थिटे, तर सरस्वती शिंदे यांनी अपक्ष अर्ज केला होता. अर्जाच्या छाननीत उज्ज्वला थिटेंनी नामनिर्देशन पत्रात सूचकाची सही केली नसल्याचा आक्षेप घेण्यात आला होता.त्यानंतर थिटेंचा अर्ज अपात्र ठरवण्यात आल्याची माहिती अनगर नगरपंचायतचे निवडणूक निर्णय अधिकारी सचिन मुळीक यांनी दिली. नंतर अपक्ष उमेदवार सरस्वती शिंदेंनीही अर्ज मागे घेतला आणि प्राजक्ता अजिंक्यराणा पाटील यांना अनगर नगरपंचायत नगराध्यक्षपदी बिनविरोध निवड झाल्याची घोषणा करण्यात आली.
About the Author
