सोलापूर- नगर पंचायत आणि नगर परिषद निकालात भारतीय जनता पक्षानं जोरदार मुसंडी मारत पहिला क्रमांक पटकावला. २८८ पैकी १२० नगराध्यक्ष भाजपचे निवडून आले आहेत. त्यानंतर शिवसेना आणि राष्ट्रवादी काँग्रेसचा क्रमांक लागला आहे. पण माढा लोकसभा मतदारसंघात भाजपचं पानीपत झालं आहे. या मतदारसंघातील ४ नगरपालिकांमध्ये भाजपचा पराभव झाला आहे. माढ्याचे खासदार आणि राष्ट्रवादी काँग्रेस शपचे नेते धैर्यशील मोहिते पाटील यांनी ताकद दाखवून दिली आहे.घायल हू, इसलिए घातक हू, हा धुरंदर चित्रपटातील डायलॉग मारत राष्ट्रवादी काँग्रेस शपचे खासदार धैर्यशील मोहिते पाटील यांनी भाजपला डिवचलं. विजयाचा गुलाल उधळणाऱ्या मोहिते पाटील यांनी जल्लोष केला. त्यांच्या डान्सचा व्हिडीओ सोशल मीडियावर व्हायरल झाला आहे. मोहिते पाटील यांचं होमग्राऊंड असलेल्या अकलूज नगर परिषदेत मोहिते पाटील विरुद्ध भाजप असा थेट सामना झाला. त्यात मोहिते पाटील यांनी वर्चस्व दाखवून दिलं. माढ्यात मोहिते पाटील यांची ताकद मोठी आहे. त्याची प्रचिती यंदा पुन्हा एकदा आली.अकलूज सोबतच करमाळा, कुर्डूवाडी आणि सांगोलामध्येही भाजपला पराभव पत्करावा लागला. अकलूजमध्ये मोहिते पाटील यांनी आपला बालेकिल्ला राखला. तर सांगोल्यात त्यांनी भाजप विरोधात लढत असलेले शिंदेसेनेचे माजी आमदार शहाजी बापू पाटील यांना अप्रत्यक्ष साथ दिली. पाटलांनी भाजपचा पराभव घडवला. इथे शिंदेसेना विरुद्ध इतर सगळे अशी लढत होती. तिथे मोहिते पाटील यांची अप्रत्यक्ष मदत शहाजी बापू पाटील यांच्या कामी आली.सोलापूरमध्ये भाजपचे मंत्री जयकुमार गोरे सक्रिय आहेत. त्यांच्याचकडे जिल्ह्याचं पालकमंत्रिपद आहे. जयकुमार गोरे हे मुख्यमंत्री देवेंद्र फडणवीस यांचे अतिशय जवळचे मानले जातात. मोहिते पाटील यांनी माढ्यात सगळ्याच ठिकाणी भाजपला धक्का देत गोरे यांना थेट शह दिला आहे. भाजपच्या पराभवाला गोरे यांचा अतिआत्मविश्वास कारणीभूत असल्याची चर्चा जिल्ह्यात आहे. या निवडणुकीच्या निमित्तानं जिल्ह्यात पुन्हा ‘मोहिते पाटील पॅटर्न’ दिसून आला आहे.
About the Author
