काय फाईट, काय निकाल, काय ताकद! शहाजी बापू पाटलांच्या सांगोल्यात आनंदी'आनंदा'; निकाल चर्चेत

सोलापूर- काय झाडी, काय डोंगर, काय हाटील यामुळे राज्यभरात प्रसिद्ध झालेले शिंदेसेनेचे नेते शहाजी बापू पाटील यांनी सांगोल्यात धुरळा केला आहे. सांगोल्यात शिंदेसेनेच्या शहाजी बापूंना एकाकी पाडण्यात आलं. पण सध्याच्या घडीला बापूंनी मैदान मारल्याचं दिसत आहे. शहाजी बापूंनी उभे केलेले शिवसेनेचे उमेदवार १७ जागांवर पुढे आहेत. सांगोला नगरपालिकेत शिंदेसेनेनं सुसाट कामगिरी केली आहे. भाजप इथे मागे पडला आहे. सांगोल्यात भाजपनं शेकापला सोबत घेत शिंदेसेनेला एकटं पाडलं. पण बापू पाटलांनी ताकद दाखवून दिली आहे.सांगोला शहरातील मतदारांचा अभिमान वाटत असल्याची भावना माजी आमदार शहाजी बापू पाटील यांनी व्यक्त केली. वर्षभरापूर्वी झालेल्या विधानसभा निवडणुकीत शिंदेसेनेनं ५७ जागांवर यश मिळवलं. शिंदेंना बंडात साथ देणारे जवळपास सगळेच आमदार पुन्हा निवडून आले. पण शहाजी बापू पाटलांचा पराभव केला. सांगोल्यात शेकापच्या बाबासाहेब देशमुखांनी पाटलांचा २५ हजारपेक्षा अधिक मतांनी पराभव केला. पण आता पाटलांनी ताकद दाखवून देत विरोधकांना चीतपट केलं आहे.शिवसेनेचे नगराध्यक्षपदाचे उमेदवार आनंदा माने यांनी विजय मिळवला आहे. त्यामुळे शिवसेनेत आनंदीआनंद आहे. नगरपालिकेच्या नगरसेवकांमध्येही शिवसेनेचे उमेदवार विजयी झाले आहेत. सांगोल्यातील जनता आपल्या पाठीमागे उभी राहिली, अशी प्रतिक्रिया शहाजी बापू पाटील यांनी दिली. ‘गेली ४० वर्षे संघर्ष करुन वैचारिक पातळीवर आम्ही आमचा मतदार तयार केला आहे. उबाठासारख्या पक्षाची घेतलेली सोबत आमच्या मतदारांना आवडलली नाही. शेकाप, उबाठा, भाजप आणि अन्य सगळेच पक्ष एका बाजूला होते आणि मला एकटं पाडलं गेलं. अचानक झालेल्या वेगवेगळ्या पक्षांची युती मतदारांनी झिडकारली,’ असं शहाजी बापू पाटलांनी सांगितलं.सांगोला नगरपालिकेच्या निवडणुकीत भाजपनं शहाजी बापूंचे कट्टर विरोधक असलेल्या शेकापचे दीपक साळुंखे यांच्याची आघाजी केली. यानंतर शहाजी बापू पाटील यांनी मुख्यमंत्री देवेंद्र फडणवीस यांना भावनिक साद घातली होती. लोकसभा निवडणूक काळात तीन महिने मी साधा आजार लांबवला. त्याकडे दुर्लक्ष केलं. आता तोच आधार गंभीर बनला असल्याचं पाटील म्हणाले होते. सांगोल्यात मला एकटं पाडण्याचा प्रयत्न केल्याचा आरोप करत त्यांनी भाजपवर सडकून टीका केली होती.विशेष म्हणजे नगरपालिका निवडणुकीचा प्रचार सुरु असताना शहाजी बापू पाटील यांच्या कार्यालयावर भरारी पथकाकडून छापा टाकण्यात आला होता. त्यांच्या कार्यालयाची झाडाझडती घेण्यात आली. त्यामुळे शिंदेसेनेत नाराजी होती. आता त्याच शहाजी बापू पाटील यांनी शिनसेनेला सांगोल्याची नगरपालिका एकहाती जिंकून दिली आहे.